Zep 1 | NdeIBE | STEP | Ilizwi likaJehova elafika kuZefaniya indodana kaKhushi, indodana kaGadeliya, indodana ka-Amariya, indodana kaHezekhiya, ekubuseni kukaJosiya indodana ka-Amoni inkosi yakoJuda:

Zephaniah 1

1 Ilizwi likaJehova elafika kuZefaniya indodana kaKhushi, indodana kaGadeliya, indodana ka-Amariya, indodana kaHezekhiya, ekubuseni kukaJosiya indodana ka-Amoni inkosi yakoJuda:

Isixwayiso Ngencithakalo Ezayo

2 “Ngizakhucula konke ebusweni bomhlaba,” kutsho uJehova.

3 “Ngizakhucula kokubili abantu lezinyamazana; ngizakhucula izinyoni zasemoyeni kanye lezinhlanzi zasolwandle. Ababi bazakuba lezinqwaba zezicucu kuphela lapho ngiqeda abantu ebusweni bomhlaba,” kutsho uJehova.

Ukumelana LoJuda

4 “Ngizakwelulela isandla sami koJuda lakubo bonke abahlala eJerusalema. Ngizaqeda konke okukaBhali okuseleyo kule indawo, amabizo abahedeni labaphristi abakhonza izithombe

5 labo abakhothama phezu kwezindlu bakhonze ixuku lezinkanyezi, labo abakhothama bafunge ngoJehova, abafunga langoMoleki futhi,

6 labo ababuyela emuva bedela ukulandela uJehova njalo abangamdinganga uJehova loba babuze ngaye.

7 Thula phambi kukaJehova Wobukhosi, ngoba usuku lukaJehova seluseduze. UJehova uselungise umhlatshelo; usebangcwelisile labo abanxusileyo.

8 Ngosuku lomhlatshelo kaJehova ngizajezisa izikhulu lamadodana amakhosi labo bonke labo abagqoke izigqoko zezizweni.

9 Ngalolosuku ngizabajezisa bonke abaxwaya ukunyathela umbundu womnyango, abagcwalisa ithempeli labonkulunkulu babo ngodlakela langenkohliso.

10 “Ngalolosuku,” kutsho uJehova, “ilizwi lokukhala lizaqonga ngaseSangweni leNhlanzi, ukulila kuvelela esiGabeni eSitsha lomsindo omkhulu wokufohloza uvela emaqaqeni.

11 Lilani lina elihlala esigodini sokuthengisela, bonke abathengisi benu bazaqedwa, bonke abathengiselana ngesiliva bazabhujiswa.

12 Ngalesosikhathi ngizaphenya iJerusalema ngezibane ngijezise labo abangakhathaliyo, abanjengewayini elitshiywe phakathi kwensipho zalo, abacabanga bathi, ‘UJehova kayikwenza lutho, oluhle loba olubi.’

13 Inotho yabo izaphangwa, izindlu zabo zidilizwe. Bazakwakha izindlu kodwa bangahlali kuzo; bazahlanyela izivini, kodwa iwayini bangalinathi.

Usuku Olukhulu LukaJehova

14 “Usuku olukhulu lukaJehova seluseduze – seluseduze njalo luza ngokuphangisa. Lalelani! Ukukhala ngosuku lukaJehova kuzakuba buhlungu, lokuklabalala kwebutho khonapho.

15 Lolosuku luzakuba lusuku lolaka, usuku losizi lokudabuka; usuku lokuhlupheka lokuchitheka, usuku lomnyama lokudana, usuku lwamayezi lobumnyama,

16 usuku lwecilongo lokuhlaba umkhosi wokulwa impi lamadolobho avikelweyo kanye lezinqaba zasemajikweni.

17 Ngizaletha usizi ebantwini njalo bazahamba njengeziphofu, ngoba bonile kuJehova. Igazi labo lizachithwa njengothuli lezibilini zabo njengamanyala.

18 Isiliva sabo loba igolide labo kakuyikwanelisa ukubasindisa ngosuku lolaka lukaJehova. Umhlaba wonke uzatshiswa emlilweni womona wakhe ngoba uzakwenza isiphetho ngokuphangisa kubo bonke abahlala emhlabeni.”